Matthew 24

Leveloklok Katling Ti Laxavaxap At Na Lavatbung Menemen

(Mk 13:1-2; Lu 21:5-6)

1Iesu ga vas kaxat basinge loogu laplavang la at lavatpas teren, luvuttadi loklok ka anasa ren diga vosiga i la diga paase mumu loogu laplavang la laraugu at ne Moroa ga tu saparav i. 2La ni ga lok tidi, “Mina ven avukat nom laraugu. A tong tuturun i rinimi. Taaleng naba vot la kopmen toxonuat at nom laraugu naba nemen at loxot teren; limixin diba vot la diba ut tereve axav i ukopok.”

3Melemu ne Iesu gat kis to at Lakaana Olip la luvuttadi loklok ka anasa xusuk teren diga vosiga i la diga sue i xeretna, “Una tong i rinama. Lingisa nom lempanga naba vot la loklok katling salai naba lok katling lovotpot taram eburu mi laxavaxap at na levenaleng?”

4La ne Iesu ga vorang i ridi xeretna, “Mina lok tatao avukat nimi kusu tara noxo xarang arup nimi mumu i na lempanga; 5mila buaang luvuttadi diba rupot mi laasen tarak la diba lok, ‘Nenia Lanarong!’ La diba sar asoogong buaang limixin mi laxalinga xaxarang atdi. 6Miba ronga i do lara esep mo ik lok la lara esep bok ba vot, ketla nemen mita marat teren. Lempanga xerepmo naba vot ketla laxavaxap at na lavatbung menemen noxo vot ap mo levenaleng. 7Limixin at levennep silok diba esep eburu mi limixin at levennep silok petpes; lavaorong silok at levennep diba esep mi lavaorong silok at levennep petpes. Lean kangking la levenangne naba vot at tengkot. 8Ana axav i naba ru katling lavakpaxaru kaxat ap mo levenmaares lolos.

9Melemu limixin diba ranga alis nimi la dina lox asongot nimi la lentaba atnimi diba sev amet di la limixin at lengkot axap diba belemamao nimi mila nemi limixin tarak. 10Ap mo laaleng buaang limixin diba ke xepe lunuunu atdi la di noxo ebalamu ela la diba song araba di ri limixin kapmek; 11la buaang lavaeme vapaase alii xaxarang dinaba vot la diba sar asoogong buaang limixin. 12Laxakapmek naba umsu, kuren la labalamu noxo nemen kantubu at limixin; 13ketla do tara na tu tuxuruxun at lunuunu ren se at laxavaxap ap mo levenmaares lolos, Moroa naba lox arooro i. 14La dinaba tong asu Lagale Lavavang mumu Linintoo ngan lavapaase asu ri limixin at lengkot axap, la melemu ba ren laxavaxap at na lavatbung menemen naba vot.”

Lavanga Xapmek

(Mk 13:14-23; Lu 21:20-24)

15La ne Iesu ga lok bok tidi, “Miba ven lavanga ba lok kapmek aleng, kerekngan leeme vapaase alii ne Daniel ga paase mumu i. Na lavanga xapmek naba tu ro xeneng at loxot kaala aleng at loogu laplavang la kerepmo naba lox amulao mo loxot.”

Nege do na us i na, neni na xasep avukat at lavasuun at na levelinga. 16La ne Iesu ga lok bok, “Ap mo laaleng nedi limixin do dina nemen to Judaia, diba sixiro uto at lempatkaana. 17Laradi do nak lok to mavana at loogu ren, ni noxo si kusu na lok ka lempanga ren boro xeneng ap mo loogu ren. 18La laradi do nak lok to xataamang, ni noxomlong bok ba uto at loogu ren kusu na lok ka lavanga singsiga ren. 19Mo laaleng naba lok kapmek aleng ti lavakin teenan eburu mi lavakin mi levengkadede atdi! 20Mina ngising ne Moroa do mo laaleng noxo vot saparap nimi edompo mi taaleng kabu kopla taaleng kaala. 21Levenmumuat ap mo levenaleng naba lok kapmek aleng tinotno. Ga ru ka i at lurutu kaxat at na lavatbung menemen ise nga na lingina, kovisi taaleng kerepmo ga vot, la kopmen bok tara tumumuat kerepmo naba vot melemu. 22La mo levenaleng ti mo levenmumuat do ne Moroa noxo lox atmur i, kopmen teta naba roo suu; ketla ne Moroa naba lox asuusu labalamu ren ti mo limixin neni gara soxolik ka vam di, la ni naba lox atmut mo levenaleng. 23Ap mo levenaleng nemen gat mita nuunu at levelinga at tara na lok tinimi xeretna, ‘Mina ven ba i, neni nga na Lanarong!’ Kopla na lok, ‘Neni nga no!’ Nemen mita nuunu at nom levelinga atdi. 24Mila buaang nedi limixin babala diba lok do nedi mo lavanarong at ne Moroa la lavaeme vapaase alii ren; diba lok tempanga sangsangu kusu diba sar asoogong lavaanat soxolik at ne Moroa, mo do di epovo. 25Mina ronga avukar i na. A tong alii avot ta i rinimi.

26La mo do tentaba dina lok tinimi, ‘Mina ven ba Lanarong, no nga i at lamatbin!’ Nemen gat nimi guta vas kaxat ugo; la do dina lok tinimi, ‘Mina ven ba i, na nga i lipe de at na loogu!’ Nemen gat nimi guta nuunu atdi; 27mila nenia, Laradi Mevana, anaba vot soso ngan lavanga i mam to at levengkot axap, i tara koxorop lara takabu de vana at laxalibet. 28Ap mo loxot limixin diba met teren, lempatmaalom diba vot buru ve kusu ri anan levenbaaxin tadi.”

Lovotpot At Laradi Mevana

(Mk 13:24-27; Lu 21:25-28)

29La ne Iesu ga lok bok, “La soso mun melemu at levenmumuat ap mo levenmaares, leveloklok katling naba vot;

‘Losoosoo at laxangking naba xap, la lagaaling noxo soosoo. Larapenti naba subu si boro vana at laxalibet eburu mi lempanga axap meve diba sixit ekarakat la kopmen di noxo sixit mu larangas atdi.’ ^a

30Ap mo laaleng loklok katling tarak, Laradi Mevana naba vot asuvos to vana at laxalibet, la limixin at levennep axap at na lavatbung menemen dinabak saxaanu. Dinaba ven ia, Laradi Mevana, anaba vot at loxontakabu mi langsangan lololos la lisisixam silok. 31La lubung angelo diba ronga lerengteng at luru la nia aba riki di uto at lengkot axap kusu dina lam kaka lavaanat soxolik at ne Moroa boro at lavanuet laramesuluk at lavanuet laramera manman at na lavatbung menemen.”

Laanasa Mumu Luuna Pik

(Mk 13:28-31; Lu 21:29-33)

32La ne Iesu ga tong lara lavapaase poovo ridi xeretna, “Mina ronga na laanasa mumu luuna pik. Dola levesiliklik at larauna pik di mumulum la levenang i su xat, nemi miklen i do lamaares i auret ta. 33La kerepmo do mina ven na lempanga loklok katling na vot, mina xasep do lovotpot tarak, Laradi Mevana i auret, i ngan laradi i tu at lumusaragu at loogu la i gagas kusu na beles teren. 34Nia a tong tuturun i rinimi. Limixin at na loola di rooro lingina di noxo met se na lempanga na ravasu. 35Laxalibet mi lavatbung menemen naba sonao, ketla levelinga rak noxo xap.”

Kopmen Tara Iklen Laaleng Laradi Mevana Naba Vot

(Mk 13:32-37; Lu 17:26-30,34-36)

36La ne Iesu ga lok bok, “Kopmen tara naklen laaleng at lovotpot tarak; lubung angelo bok kopmen dinaklen i la nenia, ne Nitna bok kopmen anaklen i. Tamak kusuk mun iklen i. 37At lovotpot at Laradi Mevana, loklok at limixin naba lok ngan loklok at limixin ap mo levenaleng at ne Noa. 38Ap mo levenaleng avot ti mo laran limixin diga anan la diga inin, lavatlok la lavakin diga vepot ga se at nom laaleng ne Noa ga beles ti lavattaaxup. 39Mo limixin kopmen di goxoklen i do laran mo naba vot, ketla ga rupot la ga sev amet axap nedi. Laaleng at lovotpot tarak, Laradi Mevana naba lok kuren. 40Ap mo laaleng tegepu radi duba gugu ro xataamang; lubung angelo diba lok ka legesara la lara naba nemen alu. 41Tegeputkin duba sep povorok levempiao; lubung angelo diba lok ka legesara la lara naba nemen alu.

42Kuren la mina lok tatao avukat nimi mila kopmen minaklen i do at ua laaleng nenia, Leeme Silok atnimi, anabamlong teren. 43Ketla mina xasep at na lavapaase poovo. Mo do laradi at loogu iklen i do at ua loxonaleng laradi xipkip pilo ba vot teren, neni ba kuxut avukat la laradi xipkip pilo noxo das beles at loogu ren. 44Kuren la mina gagas avukat mila nenia, Laradi Mevana, anaba vot ap mo laaleng limixin di doxoma i do nenia a noxo vot teren.

45Mo laradi ruturun la lasaxaruki avukat, neni mo, leeme silok teren ba lok katling i xusu na lok tatao lavasaxaruki ren la nam taba di mi levempanga anan at levengkonaleng mokmokso. 46Naba lox avukat ti mo laradi mo do leeme silok teren nabamlong la na long lenget ka i do i lox epovo lugugu ren. 47Nia a tong tuturun i do mo leeme silok naba lok li mo laradi kusu na lok tatao levempanga axap teren. 48Ket do nom laradi neni laradi xapmek la i lok, ‘Leeme silok tarak noxomlong soso.’ 49La ip sev asongot lentaba lavasaxaruki la i anan la ira inin tangtangku eburu mi limixin di inin tangtangku amisik. 50Leeme silok teren nabamlong at tara taaleng lasaxaruki ren ixo doxoma i do ni naba vot teren la at loxonaleng neni kopmen naklen i. 51Nom leeme silok naba sev asongot aleng nom lasaxaruki ren la ni naba riki i uto at lemenemen songsongot kusu na nemen eburu minedi lavapen aala. Mo go dibang teng la dina rungur ivivilis.”